Hierdie Kersfees kon ek dit nie verhelp nie, my gedagtes het gedurig in Israel  gaan kuier. Daar in Betlehem waar ons Messias in ‘n stal gebore is. Maria, sowel as Josef aan haar sy, was Jode. Hulle was afstammelinge van Abraham, die vriend van God.  Abraham wat uitgelei is na die land wat God vir hom en sy nageslag belowe het. Abraham wat ook die vader geword het van almal dwarsoor die wêreld wat in Christus glo.  Wie hier op aarde kan die feit uitkanselleer dat die Messias gekom het deur die volk van God?  Al die nasies en volke word in Hom geseën soos God aan Abraham beloof het.

Daar waar Christus, die Seun van God, mens geword het, daar waar die herders ‘n boodskap van groot vreugde ontvang het van ‘n engel uit die hemel en die groot skare engele gesien het wat met jubelende vreugde sy boodskap bevestig het, dáár word die volk van God nou met uitwissing gedreig. Dit klink vir my asof haat teen die Joodse volk besig is om oor die hele wêreld uit te kring. As ek reg hoor en lees is daar nasies en groepe wat planne maak om Israel te verwoes en hulle kyk met afkeer na iemand wat dit waag om ‘n goeie woordjie vir die Israel te doen.

Tog het ons die Bybel ontvang vanuit die volk Israel! Hoe anders sou ons geleer het van God as Moses nie neergeskryf het wat God aan hom openbaar het nie? Moses was ‘n Israeliet, ‘n Jood. Dit is hy wat behoue gebly het toe al die baba seuntjies van die volk van God doodgemaak moes word op bevel van die koning. Moses, ‘n merkwaardige Jood met wie die lewende God – die Skepper van hemel en aarde – van aangesig tot aangesig gepraat het soos met ‘n vriend.

Deur sy geskrifte leer ons hoe God die hemel en die aarde geskape het – en vir Adam en Eva. Ons kom te wete van God se vyand wat hom daarop toegespits het om die werk van God te beskadig en Hom teë te staan. Ons lees van Henog wat met God gewandel het, van Noag wat die ark moes bou waarin sy gesin en diere van verdrinking en uitwissing gespaar is. Ons ontmoet Abraham en lees van God se verstommende goedheid en genade, en die hoop en liefde wat Hy oor Abraham uitgegiet het. Ook van sy beloftes aan Abraham en sy seun Isak en dié se seun, Jakob. Ons lees van Jakob se seun, Josef, wat gesorg het dat al die afstammelinge van Jakob na Egipte gekom het om die droogte te oorleef. Hoe hulle slawe geword het. Moses het alles opgeteken van die uittog uit Egipte en God se sterke hand teen Farao. Die volk se ontmoeting met die lewende God by die berg, Sinai en die hele geskiedenis van God se handelinge met sy volk totdat hulle die beloofde land ingetrek het.

Dan volg die geskiedenis van hulle nuwe leier, Josua, van die rigters van Israel, die konings, die profete en die baie verskillende beloftes oor die Messias wat gebore sou word in Betlehem, die stad van Dawid.

Jesus Christus en sy dissipels was Joodse manne. Johannes die Doper was Joods. Mattheus, Markus, Lukas en Johannes wat vir ons die lewe van Christus beskryf, was almal uit die Joodse volk. Paulus was Joods. Van die begin tot die einde van die Bybel het die Heilige Gees manne uit die Joodse volk geïnspireer om die verskillende Bybelboeke te skryf.

Ons het die Messias wat gekom het om ons sonde weg te neem en ons met God die Vader te versoen vanuit die Joodse volk ontvang. Ons het die Woord van God, die Bybel, vanuit die Joodse volk ontvang. Daarom was my hart hierdie Kersfees vol dankbaarheid en jammerte oor die volk van God, wat soveel haat en hoon moet deurgaan in my leeftyd.

Al die beloftes van die Messias wat sou kom, is vervul. Mag Hy wat beloof het om na sy eie volk om te sien en hulle te seën, ook al die beloftes in verband met die volk Israel in vervulling laat gaan.

Ek het ook so gedink aan Corrie te Boom. Sy vertel hoedat haar bejaarde pa die Dawid ster teen sy baadjie vasgesteek het om hom openlik te skaar by die Jode wat so vervolg was gedurende die Tweede Wêreld oorlog. Oor sy liefde en lojaliteit vir die volk van God is hy in ‘n tronk gestop en daar het hy gesterf. So ook haar suster Betsie, maar Corrie het bly leef om die storie te vertel. In ons leeftyd vind die Hemelse Vader sekerlik ook sulke mense, mense wat vasstaan agter sy volk en diep meegevoel met hulle het.

Dit is waar dat Christus, die Seun van God, vervolg was deur sy eie mense. Hulle het Hom uitgelewer aan die Romeine om gekruisig te word. Tog is daar vandag ‘n groot menigte van die volk van God wat in Hom glo – in die Messias wat daar in Israel op Golgota gekruisig was. Die profeet Sagaria het geskryf wat God in die verre toekoms vir sy volk bedoel: “Maar oor die huis van Dawid en die inwoners van Jerusalem sal Ek uitgiet die Gees van genade en smekinge: en hulle sal opsien na My vir wie hulle deurboor het, en hulle sal oor Hom rouklaag soos ‘n mens rouklaag oor ‘n enigste seun en bitterlik oor Hom ween soos ‘n mens bitterlik ween oor ‘n eersgebore kind.”

Kersfees het gekom en gegaan en ‘n nuwe jaar lê voor ons. Wat dit vir ons inhou, weet net die God wat ons geskape het. Hy het die hele wêreld in sy hand en Hy het vir elkeen van ons ‘n lewe in Christus belowe as ons glo in Hom wat van God gestuur is. Christus het mens geword en in die liggaam van ‘n Jood sy lewe vrywillig oorgegee om as die Lam van God geoffer te word sodat die hele wêreld ingesluit kon word in die verlossing wat die offer bied. Die verlossing van sonde en die ewige dood het vanuit die Joodse volk na ons almal gekom. Kom ons dank God vir die realiteit van hierdie wonderbare verlossing in die agterstevoor tyd waarin ons leef.